وقفة الطاقم الطبي بمعهد الأورام للمطالبة بعمل تحليل فيروس كورونا ومحاكمة مدير المعهد سبب نقل العدوي للمعهد

قام أفراد الطاقم الطبي بالمعهد القومي للأورام بالقاهرة بتنظيم وقفة أمام المعهد، للمطالبة بعمل تحليل فيروس كورونا للتأكد من سلامتهم من الإصابة بفيروس كورونا المستجد، بعد إكتشاف إصابة 17 شخص من الطاقم الطبي منهم 13 من التمريض و4 أطباء.

وقالت طبيبة بالمعهد أن ممرضاً أُصيب بالفيروس منذ إسبوعين وبعدها شعرت مشرفة تمريض بأعراض المرض ولكن مدير المعهد رفض منحها أجازة، وثبت بعد ذلك إصابتها بالفيروس، وتم عمل تحليل لعدد 40 فرد من المخالطين ليتبين إصابة 15 أخرين بالفيروس ليصبح العدد 17 مصاباً بالفيروس، حتي الأن.

وقررت جامعة القاهرة، فتح تحقيق حول إصابة 17 شخصاً من الأطباء والتمريض بالمعهد القومي للاورام بفيروس كورونا المستجد، للوقوف على أسباب التقصير إن وجدت، ومعاقبة المتسببين والاطلاع على كافة التفاصيل حول الأزمة.

ومنذ إسبوع حذرت صيدلانية تعمل بالمعهد من وجود حالات إصابة بفيروس كورونا من بين الممرضين والأطباء، والمعهد يتكتم علي الخبر.

وقال ممرض بمعهد الأورام، “بما إن الدكتور حاتم أبو القاسم طالع بيقول إن الإصابات كلها من هيئة التمريض، وإن الإصابات احنا اللى جايبنها بنفسنا.. لاء أنا أحب أقولك يا دكتور حاتم إن احنا مش اللى جيبنا العدوى.. سيادتك الحالة اللى كشفت عليها بنفسك وقعدتها فى العزل يومين عندنا فى الطوارئ هى اللى عملت كده”.

وأضاف الممرض بمعهد الأورام – أثناء تصويره لأحد أدوار المعهد الفارغة من المرضى والعمال دون أن يظهر بوجهه – “أنا تمريض فى المعهد والدور بتاعة فاضى، بناءً على أيه لما التمريض هو اللى عيان فأنت فضيت الدور ومشيت العيانين وخليت حالات قليلة اللى موجودة.. سيادتك اتعاملت مع الحالة بدون وقاية لا لبست ماسك ولا لبست جوانتى.. وقولت الحالة مش كورونا.. على أى أساس حددت ده؟”.

وتابع “الممرض قائلاً، “طيب حضرتك قولت الحالة مش كورونا وفيما بعد الحالة طلعت كورونا.. الحالة دى صابت كام شخص ومين مات ومين عايش ومين تعبان ومش عارف يعمل إيه.. أنت بقى فين من دا كله غير إن أنت طالع عايز تعمل شو.. وبتقول مفيش أى حاجة حصلت وإن الدنيا عندنا تمام.. طيب أنا بقى بقول لحضرتك ياريت المعهد يتقلب عندنا حجر صحى”.

وأضاف عضو فريق التمريض، “كده مش هينفع احنا كده اللى بنموت نفسنا ومش بنحافظ على بعض.. وأنا مش خايف من أى حاجة أنا خايف على أهلى.. المعهد أهوه فاضى إزاى أنت بتقول هتخليه شغال إزاى أنت بتطلع تقول الكلام ده.. هل أنت عملت مسحات وتحاليل للتمريض والأطباء والعمال؟”.

وفى المقابل، تجمع عدد كبير من الممرضين بمعهد الأورام، أمام مكتب الدكتور حاتم أبو القاسم، احتجاجًا على عدم إجراء المسحة والفحوصات اللازمة عليهم، وقال أعضاء التمريض، فى مقطع فيديو آخر يوثق لحظة وقوفهم أمام مكتب عميد المعهد، “مش بيصرفولنا الكحول”.

وإستجابة لضغط التمريض، خرج لهم عميد معهد الأورام من مكتبه، وقال لهم، “الوقفة دى غلط علينا كلنا.. مش احنا قولنا بعد اجتماع مجلس المعهد هنجتمع فى القاعة.. هنجتمع بطريقة حضارية”، فردت ممرضة، “لاء يا دكتور مش هنطلع احنا عاوزين نعمل مسحات.. أنا مخالطة للمصابين وكل الناس دى مخالطة ليهم.. لو أنتوا مش خايفين علينا احنا خايفين على ولادنا”.

ورد عليهم الدكتور حاتم أبو القاسم، قائلاً، “المسحات بنجيبها من الوزارة وأنا طلبت من الوزارة 500 مسحة عشان نعمل للكل”، فيما هدد الممرضين بالنزول إلى الشارع أمام مبنى المعهد حال عدم وفاء الدكتور حاتم، بوعده لهم بالاجتماع معهم عقب انتهاء اجتماع مجلس إدارة المعهد.

وفي ذات السياق، قالت هالة عزت، أحد العاملين بالمعهد، مدير المعهد بيقول ان الممرضين والعاملين سبب نقل العدوي للمعهد، الحقيقه يادكتور إن عندك رئيس قسم اسمه عماد عبيد دخل حاله من مستشفي هرمل مش مريضه معهد دي حاله خاصه بيه بعيادته، والحاله كان عندها كل اعراض الفيرس هيا وامها وطلب من النواب والتمريض بالامر انهم يشتغلوا علي الحاله، ولما رفضوا وطلبوا عمل تحاليل للحاله الحاله خلعت من المستشفي وبعدها بكام يوم اكتشفنا اصابه سيد، وبدا الخيط يجر تمريض.

وبالنسبه لينا ياسياده العميد الحاله اللي انت اشتغلتها وقلت معندهاش حاجه وحجزتها في الطوارئ وكلعت مصابه فعلا، الحقيقه ياسياده العميد المشرفه اللي حست بالاعراض وطلبت اجازه وانتم رفضتم لحد ما طلعت ايجابي ونقلت العدوي لكتير.

وتابعت “عزت”، لحقيقه ياسياده العميد انك دمرت بيوتنا كلها ونشرت الوباء بينا وبين المرضي، الحقيقه ياسياده العميد انك خليت ايمن الصيرفي تمريض مخالط الحاله الايجابيه يومين اديته خمسين جنيه وقلتله روح في تاكسي؟

وإستكملت “عزت|، الحقيقه انك قلت معنديش حالات مصابه زي ماقولت قبل كدا معنديش شهداء، الحقيقه ان كل بيت مننا دلوقت متدمر من الوهم اكتر من المرض، الحقيقه ان احنا بنشحت الماسكات ومش بنلاقيها اصلا علشان نحمي نفسنا.

طبيب بالمعهد: تم تهديدي بالرفد عندما طالبت بحماية المعهد من فيروس كورونا

كما قال الدكتور ارميا محسن، طبيب بالمعهد أنه تعرض للتهديد بالرفد والفصل عندما طالب أكثر من مرة بحماية المعهد من إنتشار فيروس كورونا وتطبيق جميع الإجراءات الوقائية.

وأضاف “محسن”، أغلب المؤسسات الكبيرة التزمت بكل ده ماعدا معهد الاورام، بدأنا الاول بصراع مفاده انه معهد الاورام ذات طبيعة خاصة وعيانين الاورام طوارئ كلهم و مينفعش نقفل مع اننا ياما بنقفل فى الاعياد و الاجازات الرسمية ومؤتمرات قسم الجراحة لكن الكورونا ماتستهلش اننا نقفل اسبوعين ونكتفى بالطوارئ علشان نقتل دورة المرض واللى لو اصاب مريض من مرضى الاورام معندهوش مناعة فهو ميت لا محالة.

وتابع “محسن”، وبعد ضغط و صراعات لاسابيع بدأت تيجى قرارات متاخرة و مش متناسبة مع حجم الازمة و تم البدء فى تقليل اعداد العمليات و منع الاقارب للدخول الى العيادات و تقليل عدد الحالات و اغلب القرارات ماتنفذتش او تم تنفيذها جزئيا و بعضها كان على الورق فقط.

واستكمل “محسن”، بعدها بدأ يظهر تمريض داخل المعهد مصاب وفضل يجى المعهد أيام و هو مصاب واحنا منعرفش فاتعدى منه مرضى واطباء وتمريض، واترفض عمل مسحات لكل المخالطين ليه واتقال بالبق اللى مخالط له يعزل نفسه بس كله فضل فى مكانه وشغالين بكامل طاقتنا لحد لما ظهر بعدها حالات تانية لتمريض و أطباء وبدأت مسحات الاطباء بتطلع ايجابى حتى لو مش عندهم اعراض مما يعنى احتمالية بنسبة 100% اننا تحولنا لاداة نقل العدوى كاطباء وفريق طبى بنعدى بعض و بنعدى المرضى و اهاليهم اللى بيجوا المعهد و يمشوا و بنعدى اهالينا اللى بنروحلهم بيوتنا.

وتابع، كل ده و احنا كلامنا بيتاخد باستخفاف و اللى صوته يعلى او يعترض يتقال عليه بتاع مشاكل و يتهدد بفصله او تعطيل تثبيته و المعهد كما حذرنا جميعنا كنواب و تمريض الفترة اللى فاتت بقى اكبر مكان فى مصر طالع منه حالات ايجابى يوميا ، الحالات اللى طالعة مننا بيتصلوا بينا يبلغونا اننا ايجابى و لازم نتعزل واحنا جوة المعهد وشغالين مع بعض و مع المرضى و حتى ادوات الحماية اللى بنستخدمها فهى مجهودات ذاتية تم توفيرها بمعرفة اساتذتنا فى بعض الاقسام ولا تكفى الجميع ولا تكفينا لمدة بعيدة و اى حد فينا بيتكلم فى غلق المعهد وعزله و تعقيمه و عزل كل العاملين فيه علشان يحمى نفسه و اهله و زمايله و المرضى بيتخون ويتهم انه بيتدلع ومش عاوز يشتغل و الناس اللى بيترفض يتعملها مسحات و بتطلع تعملها برة بتطلع ايجابى ، احنا حياتنا فى خطر زايد عن اى خطر بيواجه اى حد الفترة دى.